መውረርያ ሓራምዝ

ሓንቲ ስድራ ደቃ ሒዛ ካብ ከተማ ውጽእ ናብ ዝበለ መካነ-እንስሳታት በጽሐት። እቶም ቈልዑ ነዊሕ ዝተጸበዩዋ ዕለት ስለ ዝኣኸለት ኣዝዮም ተሓጒሶም ነበሩ። ነቶም ኣብ ነናቶም መዳጐኒታት ኣትዮም ዝነበሩ ዝተፈላለዩ እንስሳታት ድማ እናዘሩ ተዓዘቡዎም። ኣብ ሞንጎ፡ ነቶም ቈልዑ ብዝያዳ ኣቓልቦኦም ዝስሕብ ትርኢት ኣጓነፎም። እቶም ሓራምዝ ኣብ ሓጹር ተዳጒኖም ወይ ብሰንሰለት ተኣሲሮም ብዘይምንባሮም ኣዝዩ ኣርመሞም፣ ቅጥን ብዝበለ ገመድ ሓደ እግሮም ጥራሕ ተኣሲሮም ነበሩ።

ሓደ ካብ’ቶም ቈልዑ፡ “ንምንታይ ደኣ እዞም ሓራምዝ ኣብ መዳጐኒ ዘይኣተዉ፧ ካብዚ ወጺኦም ክጠፍኡ ኣይክእሉን ድዮም፧” እናበለ ንወለዱ ሓተተ።

ነቶም ሓራምዝ ካብቲ መኻን ከየምልጡ ሒዛቶም ዝነበረት ቀጣን ገመድ ብምንባራ፡ ነቶም ከየስተውዓልሉ ዝጸንሑ ወለዲ’ውን ሕቶ ኰኖም። ሓንሳብ እኳ ንምብታኹ ክፍትኑ ብዘይ ምርኣዮም ድማ ተገረሙ። እንተ ዝፍትኑ በናቚሮሞ ክኸዱ ከም ዝኽእሉ ርዱእ’ዩ ዝነበረ።

እቶም ቈልዑ፡ ቍንቍኛኡ ክፈልጡ ናብ ሓለዋ ናይቶም እንስሳታት ቀሪቦም ክሓቱዎም ንወለዶም ወትወቱዎም። ነቲ ኣብ ጥቓኦም ዝነበረ ኣባል ሓለዋ እንስሳታት ድማ ሓተቱዎ።

ክምልሰሎም ድማ ጀመረ፤

ንኣሽቱ እንከለዉ ብተመሳሳሊ ገመድ ኢና ንኣስሮም ዝነበርና። ሽዑ ክብንጥሱዎ ብዙሕ ፈቲኖም ኣይከኣሉን። እናዓበዩ ብዝኸዱ በናቚሮሞ ክኸዱ ይኽእሉ እኳ እንተ ነበሩ፡ ንኣሽቱ እንከለዉ ደጋጊሞም ፈቲኖም ስለ ኣበዮም፡ “ክንበትኮ ኣይንኽእልን ኢና፡” ኢሎም ስለ ዝኣምኑ፡ ብድሕሪኡ ፈቲኖሞ ስለ ዘይፈልጡ እዮም ከምዚኣ ኢሎም ዘለዉ።

እቶም ወለዲ ኣብ ሓሳብ ጠሓሉ፣ ንድሕሪት ተመሊሶም ኣብ ምፍታሽ ኣተዉ።